Mu mikino ya CAF Champions League, kuri uyu wa Gatatu ikipe ya Rayon Sports iracakirana na LLB y’i Burundi mu mukino wo kwishyura uzabera i Bujumbura. Ubuyobozi bwa Rayon Sports bukaba bwemereye abakinnyi bayo ko nibasezerera iyi kipe bazagabana miliyoni 12 n’igice nk’agahimbazamusyi.
Abakinnyi hamwe n’abatoza ba Rayon Sports bemerewe agahimbazamusyi ka miliyoni 12 n’igice z’amafaranga y’u Rwanda ni babasha gusezerera LLB y’i Burundi.
Ku itariki 10 Gashyantare nibwo kuri stade Amahoro i Kigali habereye umukino ubanza wahuje aya makipe yombi ukarangira anganya igitego kimwe kuri kimwe.
Kunganya muri uyu mukino ubanza byongereye LLB amahirwe yo kuzakomeza mu cyiciro gikurikira mu gihe ku ruhande rwa Rayon Sports amahirwe y’agabanutse.
Kuri uyu wa Gatatu tariki ya 21 Gashyantare 2018 nibwo aya makipe yombi agomba kwisobanura mu mukino uzabera kuri stade Prince Louis Rwagasore mu mujyi wa Bujumbura.
Mbere yuko Rayon Sports ihaguruka i Kigali yerekeza muri iki gihugu cy’abaturanyi, ubuyobozi bw’iyi kipe bwakoranye inama n’abakinnyi maze babemerera kuzabaha agahimbazamusyi kangana na miliyoni 12 n’igice z’amafaranga y’u Rwanda mu gihe baramuka basezereye LLB y’i Burundi.
Mu mateka ya Rayon Sports aya niyo mafaranga menshi iyi kipe izaba ihaye abakinnyi nk’agahimbazamusyi ku mukino umwe, buri mukinnyi yazegukana ibihumbi 460 by’amafaranga y’u Rwanda.
Amakuru Ibyamamare.com dukesha bamwe mu baba hafi ya Rayon Sports avuga ko umutoza Lomami Marcel, rutahizamu Bimenyimana Binfils Caleb n’umunyamabanga wayo Bernard Itangishaka bita King baraye i Burundi mu rwego rwo gutegurira inzira bagenzi babo bafata indege kuri uyu wa kabiri saa 16h.
11 babanje mu kibuga ubwo bakinaga umukino ubanza i Kigali.
Post a Comment